CEMAAT medyamiz Ay-Serezli Rüstem Useinovnıñ tek başına bergen mucadelesine diqqat eterek bu ikâyeni devamlı sizge taqdim etmege maqsatlana.

İkâyeniñ tili tabiy olmasını közde tutup karamanımıznıñ sözlerini onıñ Ay-Serez şivesinde bastıramız. Olup keçken vaqialarnı bu menbaağa tıqlap hatırlabilirsiniz

Qısqası, 2021'de rus işgalcileri eski Ay-Serez topraqlarında qurulğan qasabanı yıqıp insanlarnı öz topraqlarını terk etmege mecbur ettiler. O zamanı 67 yaşını toldurğan Rüstem ağa arsasını taşlamayıp inşaat vagonçuğunda (romörkta) eki köpeginen beraber ayatını sürdürmege devam etti. Bu dört yılda işgalciler onıń saçqan incir bağçasını ziyerleterek tereklerni quruttular ve ahır sonu 2025 Oraza (Ramazan) bayramnıñ arfesinde baş soqacaq vagonçuğuna da el qoyaraq 71 yaşındaki qartnı damsız bıraqtılar.

"Sen ne belliysin, Osman, bunu yaphanlar tek işgalciler mi? Tankist Abduraman hartn torunu Eldar, uçastkovıy (polis) Ablâmit, Sudah imamı Mustafa, episi tayfa olup geldiler. Arabacı da bizimki edi. Gittim onu biraz uyandırayım dedim: "Ahşam ana-babana mahtanırsın, oğlum, bugün bizimkini evinden sürdüm dep". Cevabına şaşmadım: "men çalışmasam horantamı kim aşatır?"

Rüstem ağa eki afta devamında gecelerini arabasında keçirdi. "Çadırda yaşaycam" dep yerinden qıbırdamadı, kerekli çadır qıdırdı. Uyğun soyunu tapalmayıp keçken afta sıradan eki kişilik bir çadır satın alıp toprağında yerleştirdi.

‍

"Bayramlıh çoh insan geldi sağolsunlar. Cemaat tek başıma bırahmadı. Amma çadırnın içinde daa yatmadım. Yastıh yorğan gerek, varıp unları da alsam olacah. Bayram daa bitmdi, dostum, gelen giden devam etiy."

Rüstem ağamıznıñ soñki baş soqacaq qonudu sürdürülgen soñ geodezistler eki kere kelip Qırımtatarlıqtan temizlengen eski Ay-Serez topraqlarını ölçep çıqtılar. Deniz yalısındaki bu yer satılğanı belli lâkin yañı saibi kim olğanını işgalciler gizliyler.

"Deputat Eldarnı (Eldar Osmanov Sudaq ișgalci akimiyetnin reis muavini) geldiginin sebebi de bu. Burdan git, bu yerde başha bir şey olacah dep geldi. Ahılında mana bir teklifi var gibi geldi amma götü tutmadı söylemeye. İgrenip onu yahın almadım"

Sürülgen qasabanıñ yaninda sovetlerden qalğan Ukrayna ilim Akademiyasına ait "Almaz" pansionatı yerleşe. Qırımnıñ işgalinden soñra bu mülk Kadırovcu çeçenlernin eline keçken. Yağmacılar 4,2 gektarlıq pansionattan başqa etraftaki 5 gektarnı daa ellerine keçirgenler. O topraqnıñ adı sovet devirinde Şeftale bağçası eken. Yañı saipler müsülmanmız dep Qırımtatarlarnen bağ qurmağa da tırışqanlar.

"Geçenlerde mana da oğradılar. Soradım. siz Hırıma haçınçıdır geldiğiniz? "Birincidir" diyler. Demek Ukraina zamanını görmediniz de şimdi duşmanımın dostu olup geliysiz. Size söyleceğim - öyle müsülmanlıh mana bir kapik etmez"

Rüstam ağa añlata, Șeftale bağçasını ruslar saçqanlar lâkin bareketi olmağan. Qurup ketken, tek adı qaldı ve boş toprağı.

"Denize 10-20 metrelik mesafede şeftali saçılır mı. Bu direk pek nazlı. Deniz yelinden çiçegi yanay. Suvuh sıcahlıhní tez degişmesini sevmez. O yerde incir olur. Şeftaleni bayır artına sahlacan. İşte bilginiz, asramağa adetiniz olmasa bir şey geregi gibi olmay".

Eki afta içinde işgalciler bayağı areketli faaliyet köstereler. Eski-Aysereznin toprağına 1000 küpmetre şahıl tökkenler. 25 tonluq eñ azından 50 yük arabası (TIR) işini yapqan. Bu yerde ne qurulacağını şimdilik tek tahmin etmek mümkün. Otelcilik Qırımnın altın madeni oldu ve bereketli yerleri ise toqtamayıp Putinnin Kavkaz tamırlı piyadelerinin eline keçe.