«Qırım»nıñ keçken sanında (№ 40, 1-2 s.) milliy areketimizde körümli sıma – Muarrem Martınov ve onıñ em acınıqlı, em kerçek – er alda pek tesirli şiirleri aqqında maqale basılğan edi.
Bu munasebetnen ve muarriyetniñ ricasınen: bilgenler laf etsin, menim ayatımda yüz bergen ve Muarrem ağanen bağlı olğan bir epizodnı hatırlamağa isteyim.

...1992 senesi sentâbrniñ soñki künlerinde işnen Aqmescitten Taşkentke barmaq kerek oldı. Bu aqta Milliy Meclisniñ (Rusiyede 2016 senesinden ekstremist olaraq ilân etilgen) reisi Mustafa Cemilevge haber ettim.
Bir vaqıtları Taşkent vilâyetinde milliy areketimizniñ belli faaliyet noqtalarından biri olğan Begovat şeerinde yaşağan Muarem Martınovnıñ yanına barıp, onıñ yazğan mektübini alıp ketmemni rica etti.
Maña em reisniñ ricasını yerine ketirmek, em de özüme bu belli insannen tanış olmaq meraqlı edi, onıñ içün vaqıt ayırıp (3-4 saat yol) bu mektüpni Begovatqa alıp bardım.
86 yaşlı Muarrem ağanıñ közleri pek zayıf, atta körmey edi. Öz başına oqup olamaycağı belli edi. Lâkin kimnidir yardımğa çağırmazdan evel, mektüpni açıp oqumamnı rica etti. Böylece, o oqumağa ve mündericesini bilmege qısmet oldı.
Mektüpte Bağçasaray rayonınıñ Zalanköy şeerindeki Milliy areket iştirakçilerine qartlar içün mahsus qurulğan evden bir odalıq kvartira berilecegi ve Muarrem ağanıñ ömür arqadaşınen Qırımğa köçüv masraflarını bizim vekâletli vekil organımız öz boynuna alacağı bildirile [1] .
Mektüpni oquğanda, meni diqqatnen diñlep turğan Muarem Aanıñ közlerinden yaşlar aqtı. Soñ bir qaç saniyede:
– İbraim qardaşım, mektüpni ketirgeniñiz içün sağ oluñız! Qırımğa qaytqan soñ, Mustafağa selâm aytacaqsıñ. Mektüp içün maña teşekkür etersiñ, – dedi. Soñ sözüni devam etti: – Menim aileme qaldırılğan ev başqa lâyıq adamğa berilsin. Şimdi men Qırımğa qaytmam, – dep ilâve etti.
O, bu arada başqa milletten olğan qarısınıñ itirazlarına mania olğan kibi, kesip tekrarladı: — dedi.
– Yoq, biz şimdi qaytmaymız! - dedi.
Men, doğrusını aytsam, o vaqıtta ne içün öyle aytqanını añlamadım, soramadım. Soñ, Muarrem ağa İsraildeki qızınıñ davetinen anda barıp, közlerine ameliyat yaptıracaq olğanını eşittim.
Etrafta bu qadar muhtaclar olğanda, Qırımda bir oda alıp, onı boş tutmağa razı olmağanı açıq körüne – red etip, başqasına berilmesini rica etti.
Endi aqşam maali olğan edi, men Muarrem ağanen qave içip, yarım saat qadar subetleştik. Hatırlayım, qart Qırımdaki vaziyetlernen pek meraqlanıp, maña biri-biriniñ artından em kederli, em de ümüt ve yahşı cevaplarnen sualler berdi...
İbraim Çegertma aqqında.

‍